Xəzərin Azərbaycan sektorundakı “Azəri-Çıraq-Günəşli” (AÇG) yataqlar blokunda 1 sentyabr 2025-ci il tarixinə qədər ümumilikdə 612,2 milyon ton neft və 238,7 milyard kubmetr qaz hasil edilmişdir.
Report xəbər verir ki, Azərbaycan Dövlət Neft Şirkəti (SOCAR) tərəfindən, “Azəri”, “Çıraq” və “Günəşli” dərinsu hissəsinin birgə işlənməsi haqqında yenilənmiş və əlavə edilmiş Sazişin imzalanmasının 8-ci ildönümü qeyd olunur.
Yeni sazişə əsasən, AÇG blokunda istismar müddəti 2050-ci ilədək uzadılmış, Azərbaycanın mənfəət neftinin payı isə 75% səviyyəsində müəyyən edilmişdir.
2018-2025-ci illərdə Azərbaycan Dövlət Neft Fonduna (ARDNF) bu sazişlə bağlı 3,6 milyard dollar bonus ödənişləri daxil olmuşdur. Yatağın 2050-ci ilədək işlənməsinə ümumilikdə 40 milyard dollardan çox investisiya yönəldilməsi nəzərdə tutulur.
2019-cu ildə “Azəri-Mərkəzi-Şərq” layihəsi üzrə son investisiya qərarı qəbul edilmişdir. 2024-cü ilin aprelində bu layihə çərçivəsində ilk neft hasil edilmişdir. Bu layihə üzrə 300 milyon barel neftin hasil edilməsi planlaşdırılır.
Hazırda AÇG-də paylar belə bölünür: SOCAR – 31,65%, BP – 30,37%, MOL Group – 9,57%, INPEX – 9,31%, ExxonMobil – 6,79%, TPAO – 5,73%, ITOCHU – 3,65%, ONGC Videsh Limited (OVL) – 2,92%.
