Şamaxı rayonunda Üzüm və Şərab Festivalı çərçivəsində növbəti “Bootcamp” keçirilmiş və “Dəqiq kənd təsərrüfatında süni intellektin tətbiqi” layihəsi müzakirə edilmişdir.
Caliber.Az xəbər verir ki, bu barədə Kənd Təsərrüfatı Nazirliyi məlumat verib. Dövlət Vergi Xidmətinin Təlim Mərkəzində keçirilən “Bootcamp”də Azərbaycanın 17 ali məktəbinin “Aqronomiya”, “Məlumat analitikası”, “Elektronika” və “Hesablama texnikası” ixtisasları üzrə təhsil alan 20 tələbə iştirak etmişdir.
Proqram çərçivəsində aqrar sektorda ixtisaslaşmış şirkətlərin, həmçinin 10-dan çox akselerasiya və inkubasiya mərkəzinin mütəxəssisləri çıxış etmişlər. Təqdimatlar zamanı ekspertlər iştirakçıların təqdim etdikləri layihələrin daha da təkmilləşdirilməsi, istehsalatda, kommersiyalaşdırma və marketinqdə tətbiqi imkanları barədə öz təcrübələrini və tövsiyələrini bölüşmüşlər.
“Bootcamp” iştirakçıları biotexnoloji üsullarla yetişdirilmiş bitkilərin satışı üçün vahid platforma, suvarma şəbəkələrinin avtomatlaşdırılması, sensor texnologiyaları, kənd təsərrüfatı fəaliyyətinin ağıllı idarə edilməsi üçün proqram təminatı, su hövzələri və akvariuumlarda toplanan balıq tullantılarının təbii, təmiz və maliyyə cəhətdən sərfəli gübrəyə çevrilməsi, heyvandarlıqda Concox Qbit-4G modulu əsasında lokal GPS-izləmə sistemi, ekoloji təmiz mühitdə bioloji fermentasiya üsulu ilə propandiol molekullarının əldə edilməsi, bitki xəstəliklərini fotoşəkillərinə görə tanıyan tətbiq və digər innovativ ideyalar və modellər barədə təqdimatlar etmişlər”, – məlumatda qeyd olunur.
Kənd təsərrüfatı sektorundakı təşəbbüslər geniş müzakirə edilmiş, tələbələrə startap layihələrinin və təqdim olunan modellərinin yeni çağırışlara uyğun olaraq daha da təkmilləşdirilməsi üçün tövsiyələr verilmişdir.
“IV Üzüm və Şərab Festivalı”nda yaradılmış startap zonasında “Bootcamp” iştirakçıları öz məhsullarını və prototiplərini ziyarətçilərə təqdim etmişlər.
Xeyirəddin Nəsirzadə
