Ermənistan Təhlükəsizlik Şurasının katibi Armen Qriqoryan Berlin səfəri çərçivəsində 12 sentyabr tarixində Almaniya Federativ Respublikasının Xarici İşlər Nazirliyinin Dövlət Katibi Geza Andreas fon Geyri ilə görüşüb.
Caliber.Az saytının Ermənistan KİV-lərinə istinadən verdiyi məlumata görə, bu barədə Ermənistan Təhlükəsizlik Şurasının aparatı məlumat verib.
Görüş zamanı Təhlükəsizlik Şurasının katibi Vaşinqtonda imzalanmış razılaşmaların nəticələrini və yaradılan iqtisadi imkanları təqdim edib.
Öz növbəsində, Dövlət katibi Ermənistan hökumətinin regionda sabit və uzunmüddətli sülhün təmin edilməsinə yönəlmiş səylərini yüksək qiymətləndirib.
Tərəflər Ermənistan və Almaniya arasında ikitərəfli münasibətlərin inkişaf gündəliyini müzakirə ediblər. Xüsusilə, blokadanın götürülməsi nəticəsində yaranmış yeni iqtisadi əməkdaşlıq imkanları və bu istiqamətdə əməkdaşlığa hazırlıq müzakirə olunub. Həmçinin, enerji sahəsində əməkdaşlıq və gündəlikdəki digər məsələlər müzakirə edilib.
