Tbilisi Şəhər Məhkəməsi Gürcüstan müdafiə sabiq naziri Cuanşer Burçuladzeyə qarşı həbs qətimkan tədbiri seçib.
Bu barədə Interpressnews informasiya agentliyi məlumat verib.
Həbs qətimkan tədbiri haqqında qərarı hakim Ekaterina Barbakadze qəbul edib. Məhz belə qətimkan tədbiri tələb edib prokurorluq. Müdafiə tərəfi isə Burçuladzeni 100 min lari (37 min dollardan çox) məbləğində girov qarşılığında azad etməyi təklif edib.
Gürcüstan Dövlət Təhlükəsizlik Xidməti (DTX) Burçuladzeni 11 sentyabr tarixində saxlayıb. İstintaqın məlumatlarına görə, o, Müdafiə Nazirliyinin bir neçə yüksək vəzifəli işçisi və qohumları ilə birlikdə MRT aparatının əldə edilməsi üçün rəqabətsiz mühit yaradıb. Nəticədə avadanlıq nazirliyin vəsaiti hesabına 3,94 milyon lari (təxminən 1,5 milyon dollar) dəyərində alınıb, bazar qiyməti isə 2,6 milyon lari (təxminən 0,9 milyon dollar) olub.
Bundan əlavə, istintaq müəyyən edib ki, Burçuladze qanunsuz gəlirləri gizlətmək üçün 2025-ci ilin yanvarında İspaniyada 0,5 milyon avrodan çox dəyərində torpaq sahəsi və ev alıb. 2024-cü ilin dekabrında isə onun ailəsi Gürcüstandakı daşınmaz əmlakı bağışlama müqaviləsi ilə gizlətmək üçün saxta sənəd tərtib edib. Burçuladze İspaniyada əmlak alınmasını bəyannamədə göstərməyib.
Sabiq nazirə Gürcüstan Cinayət Məcəlləsinin qanunsuz gəlirlərin leqallaşdırılması və vəzifə səlahiyyətlərindən sui-istifadə maddələri üzrə ittiham irəli sürülüb. Ona 12 ilədək azadlıqdan məhrum etmə cəzası təhdid edir.
Burçuladze hazırki hakimiyyət dövründə (2021-ci ilin fevralından 2024-cü ilin fevralınadək) müdafiə naziri vəzifəsində olub, sonra istefaya getmişdi. İyul ayında DTX Burçuladzənin sabiq müavini Georgi Xaindravanın, həmçinin sabiq nazirin qohumu və nazirliyin sabiq işçisinin dövlət vəsaitlərinin mənimsənilməsi (təxminən 500 min dollar) ilə bağlı saxlanıldığını bildirmişdi.
