Avropa İttifaqı Rusiya’nın 2022-ci ildə Ukraynaya tam miqyaslı müdaxiləsinə görə çıxarıldığı Beynəlxalq Mülki Aviasiya Təşkilatının (ICAO) rəhbər orqanına qayıtmaq cəhdlərini pislədi.
Bu barədə Politico xəbər verir.
Çərşənbə günü Monrealdakı ICAO assambleyasında təşkilatın 193 üzv ölkəsi onun rəhbər orqanının 36 üzvünü seçəcəklər.
Hazırda Kreml özünü “yüz ildən artıq mülki aviasiya tarixinə malik ən böyük aviasiya dövləti” kimi təqdim edərək namizədliyini irəli sürür. Avropa İttifaqı buna qarşı çıxır.
«Aviasərnişinlərin təhlükəsizliyini təhdid edən və beynəlxalq qaydaları pozan bir dövlətin, məhz bu qaydaların qorunmasına cavabdeh olan təşkilatın rəhbər orqanında yer alması yolverilməzdir», – Avropa Komissiyasının mətbuat katibi Anna-Kaysa İtkonena bildirib.
Avropa Parlamentinin üzvü və Avropa deputatları nümayəndə heyətinin üzvü Dariuş Yonski Rusiyanın namizədliyini ICAO-nun nüfuzu ilə “uyğunsuz” adlandırıb.
«Bu vəzifələr sistematik olaraq beynəlxalq hüququ pozan, beynəlxalq təhlükəsizliyi zəiflədən və ICAO-nun əsaslandığı prinsipləri məhz özü pozan bir dövlət tərəfindən yerinə yetirilə bilməz», – deyə o bildirib.
Beynəlxalq Mülki Aviasiya Təşkilatının 2022-ci il assambleyasında Rusiyanın rəhbər şuraya namizədliyinə 80 səs verilmişdi – bu, ona lazım olan səslərdən altı səs az idi.
