NАТО-nun Avropa müttəfiqləri ABŞ prezidenti Donald Trampın Polşada pilotsuz uçuş aparatı ilə bağlı hadisəyə soyuq reaksiyasından narahat olur və Vaşinqtonun onları mümkün təhdidlərdən müdafiə etməyə hazır olmamasından şübhələnməyə başlayırlar.
Bunu Reuters agentliyi Avropa diplomatlarına istinadən yazır.
Avropada Trampın soyuq reaksiyasını onun “Amerika birinci” siyasətinin növbəti təzahürü kimi şərh edirlər ki, bu da Avropa ölkələrinin öz təhlükəsizliklərini özləri təmin etməli olduğunu nəzərdə tutur.
“Bu hadisə göstərir ki, Tramp [Franklın] Ruzveltdən sonrakı prezidentlərdən fərqli olaraq, Avropanın təhlükəsizliyini ABŞ-ın təhlükəsizliyinin əsas elementi hesab etmir”, – deyib ABŞ-ın NАТО yanındakı keçmiş daimi nümayəndəsi (2009-2013) İvo Daaldera.
Agentliyin mənbələrinin qeyd etdiyinə görə, keçmişdə belə hadisələr Vaşinqtonun dərhal reaksiyasına səbəb olurdu. İndi isə Trampın reaksiyası Avropada “açıq çiyinləri çəkmə” kimi xarakterizə edilir. Agentliyin mənbələrinin sözlərinə görə, Avropa siyasətçiləri ABŞ prezidentinin bəyanatlarını “məyusluq”, “təəccüb” və hətta “narahatlıq” hissi ilə qarşılayıblar.
Almaniyalı yüksək vəzifəli rəsmi bildirib ki, ABŞ nümayəndələri pilotsuz uçuş aparatı ilə bağlı hadisəni Avropa müttəfiqləri ilə müzakirə etsələr də, “tərəddüd edən” görünüblər.
“Bu administrasiya dövründə biz ABŞ-a heç nədə güvənə bilmərik. Amma biz özümüzü güvənə biləcəyimiz kimi göstərməliyik”, – deyib o, agentliyə.
Şərqi Avropa ölkələrindən birinin diplomatı ABŞ-ın reaksiyasını “sarsıdıcı sükut” adlandırıb.
“ABŞ hələ də heç kimi ruhlandırmayıb”, – deyib o. İtaliyadan olan agentliyin mənbəyi isə qeyd edib ki, NАТО-nun əksər ölkələri hadisəyə ABŞ-ın reaksiyasına mənfi yanaşsalar da, Vaşinqtonu açıq tənqid etməkdən çəkinirlər. Avropa diplomatları həmçinin ABŞ Hərbi Hava Qüvvələrinin pilotsuz uçuş aparatını neytrallaşdırma əməliyyatında iştirak etməməsindən də narahat olublar. Lakin ABŞ-da bunu hadisə zamanı Polşanın hava məkanına nəzarətin Niderlanda məxsus olması ilə izah edirlər.
