Türkiyə Miqrasiya Xidməti 2025-ci ildə mobil miqrasiya məntəqələrinin sayını 375-ə çatdırdı, bu da ölkə ərazisində qanunsuz yaşayan şəxslərin müəyyən edilməsi prosesinin səmərəliliyini artırdı.
Caliber.Az türk KİV-lərinə istinadən bildirir ki, xüsusi avadanlıqlarla təchiz edilmiş mobil miqrasiya məntəqələri xarici vətəndaşların şəxsiyyətini operativ müəyyən etməyə və ölkədə yaşamaq üçün icazələrinin olub-olmamasını təyin etməyə imkan verir.
Türkiyə qanunsuz miqrasiya ilə mübarizədə belə bir modeli tətbiq edən ilk ölkə oldu.
Yalnız 2024-cü ilin yekunlarına görə, 270 mobil miqrasiya məntəqəsində 2 milyon 465 min xarici vətəndaşın şəxsiyyəti yoxlanılıb və nəticədə 104 767 qanunsuz miqrant saxlanılıb.
Türkiyə Daxili İşlər Nazirliyinin məlumatına görə, keçən il qardaş ölkədə qanunsuz miqrasiya ilə mübarizə üzrə 4125 əməliyyat keçirilib, miqrantların qanunsuz daşınmasına cəlb olunan 2 min nəfərdən çox şəxs müəyyən edilib və saxlanılıb. Ümumilikdə, 2024-cü ildə Türkiyədən 140 min xarici vətəndaş deportasiya edilib ki, bu da 2023-cü illə müqayisədə 10 min çoxdur.
Hazırda Türkiyənin 25 vilayətində ümumi tutumu 18 780 nəfər olan Deportasiya Mərkəzləri fəaliyyət göstərir.
Türkiyə Miqrasiya Xidməti yanında fəaliyyət göstərən Deportasiya Mərkəzlərinin fəaliyyəti Avropa İnsan Hüquqları Məhkəməsi tərəfindən müəyyən edilmiş standartlara uyğundur.
